វៀងច័ន្ទ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានអះអាងនៅចំពោះមុខនាយករដ្ឋមន្ត្រីឡាវ លោក សនសៃ ស៊ីផាន់ដន ក្នុងដំណើរទស្សនកិច្ចនៅរដ្ឋធានីវៀងច័ន្ទ នារសៀលថ្ងៃទី១៣ ខែកុម្ភៈ ឆ្នាំ២០២៣ថា កម្ពុជាសម្រេចផ្លាស់ប្តូរអ្នកទោសទៅវិញទៅមករវាងប្រទេសកម្ពុជា-ឡាវដោយគ្មានលក្ខខណ្ឌ។

ថ្លែងនៅក្នុងសន្និសីទសារព័ត៌មានរួមជាមួយនាយករដ្ឋមន្ត្រីឡាវ លោក សន សៃ ស៊ីផាន់ដន សម្តេចតេជោបានលើកឡើងថា៖ «កម្ពុជាមិនចាំបាច់រង់ចាំការធ្វើបដិការទេ គឺកម្ពុជាសម្រេច និងផ្តល់អ្នកទោសនៅកម្ពុជាឱ្យវិលត្រឡប់មកកាន់ប្រទេសឡាវនេះឱ្យបានមុនចូលឆ្នាំខ្មែរ»។

សម្តេចតេជោ បន្ថែមថា កម្ពុជាក៏ធ្វើបែបនេះដែរជាមួយប្រទេសថៃឱ្យបានមុនថ្ងៃចូលឆ្នាំខ្មែរមកដល់។ សម្តេចថ្លែងដូច្នេះថា៖ «ខ្ញុំក៏បានប្រាប់ដល់សម្តេចក្រឡាហោម ស ខេង ឱ្យធ្វើការជាមួយរដ្ឋមន្ត្រីក្រសួងយុត្តិធម៌ដើម្បីធ្វើកិច្ចការងារនេះឱ្យបានឆាប់»៕